XX. mendeko Euskararen Corpus estatistikoa

Testuingurua

On Garri Cooper-en Oesteko pelikulak gogoratuz zapiaz estali nituen aho-sudurrak.

Morganen algarak Txindoki-puntako artzainak entzuten zituen.

Palakadaz-palakada, mustroak itxura berriak hartzen, konturatzerako belaunetaraino sartuta.

Lurrunetan espektro letagindunak, deabru sega-azkazaldunak, arima erratiak paradisu bila, eta Herkules lanean gogor, baina gurdikoa txepetx-kaka zen eta bestearen gainetik Dumbo toneladako plastekin bonbardatuz.

Mustroak gerriraino irensten ninduen, eta halako batean Morganek bale esan eta irristatu egin nintzen pozaren pozaz.

Baserriko zonbia berdetasuna galdurik.

Morgan gauza izan zenean (dexente kostatu zitzaion barre zoroa menderatzea), mangera niregana zuzentzeko esan nion, aurre-garbiketa egingo genuela (prelavado etxeko Zanussian bezala), eta han ihardun zuen margarita erregaitzen.

Gero korrika bizian eraso nion eskaileretan gora, erantzi eta dutxatzeko irrikaz, baina ai! amonarekin gurutzatu nintzen; uste dut azkenean deskubritu zuela norena zen etxeko behiena ez zen kaka-usaina.